| Quotation |
Hoc populus ille merito dicebat, qui spem suam in domini protectione posuerat, significans labores ecclesiae, quos primum in capite suo, id est in domino christo pertulerat et post in suis passionibus sustinebat. Primo enim quando religio innotuit christiana, omnes gentes, in eius persecutione surgentes, diuersis cladibus affecerunt fidelissimos uiros: qui tamen in suis persecutoribus (iuuante domino) uindicarunt, quando eos conuersione mirabili subdiderunt, ut de se paenitentiae poenas exigerent, quas pridem innocentibus ingerebant. Nam quod dixit: gentes et subiungit genus masculinum, ultus sum eos, siue ad intellectum pertinet, quia in gentibus populi significantur; siue schema est exallage, id est immutatio, quoniam genus hic nominis immutauit. |
