| Quotation |
Propterea dicit quia cum esset gens insipiens omnis populus idola colens, tamen gentilitatem credendo deposuit, ut sit sensus: Ego ad aemulationem uos adducam in eam gentem quae nunc gens facta est deponendo gentilitatem per fidem Christi, cum fuisset gens insipiens colendo idola. Potest etiam intelligi Moysen idcirco non gentem eam nominasse, quia christiani, non est una gens, sed ex omnibus gentibus unus populus. Nec uideatur iniuriae quod eam insensatam nominat, quoniam praeuidebat in spiritu quia per praedicationem crucis Christi quae est stultitia gentibus, congregandus erat populus, qui fiat in hoc mundo stultus ut sit sapiens apud Deum. |
