| Quotation |
dicitur enim de illis ex persona dei ad alienigenas gentes: 'nolite tangere Christos meos et in prophetas meos nolite malignari'. 10. haec cum de Abraham vel de his, qui per illud tempus ad dei cultum pertinebant, dicta referantur, evidentissime et luce clarius in ipsis et ante ipsos Christianorum gens iam tunc fuisse et omnem tenuisse pietatis ac religionis observantiam designatur, quam nunc per adventum carnalis praesentiae Christi per omnes gentes communicatam et omnibus inpertitam nationibus constat, quo sapientiae pietatisque thesaurus, qui velut intra angustum conclave pro raris quibusque cultoribus tenebatur, universum mundum fidei ac religionis profusione ditaret et quod prius viritim praebebatur, nunc simul et subito gentibus integris et populis ac nationibus ingeratur. |
