| Quotation |
Interim tramitem que reliquimus districcius gradiamur. Memoratus imperator Lodoguicus, antequam Baris caparentur, tres ammirades, quo totam Calabriam depopulabantur, cum numerosa multitudine Sarracenorum, missis suis fidelibus, prostraverunt, et non solum Calabritanorum Hismaelitum ingens extunc facta est diminucio, sed et Barensium potentatus omnimoda dissolucio. Set dum prolixa tempora eam videlicet undique obsedisset, postremum a Francis et a Longobardis est capta. Ipse namque Sagdan in unam civitati illius turrem se communivit, et nominative Beneventanum principem Adelchisum adclamat, inquid: „In fide tua me suscipe, quia teste Deo tuam filiam incontaminatam penes he habeo.“ Habuerat nupeream obsidem, et minime, licet infidelis fuisset, adhuc contaminarat. Quo audito, princeps Adelchis statim ab ipso imperatore eum expetit et accepit, necnon et duos alios suos sodales, quorum nomina fuerunt Annosum et Abdelbach. Et tota Apulia simulque et Calabria Deo previo ab hostibus potenter erepta, cum ingenti tripudio cuneatim Beneventum venerunt. |
