| Quotation |
Eodem quoque anno Karolus princeps Burgundiam adiit, Lugdunumque, Galliae urbem
munitissimam, suae ditioni subegit, et usque Massiliensem urbem et Arelatem civitatem penetravit,
suisque ducibus omnia in potestate tradens, ad sedem principatus sui feliciter remeavit; collectoque
exercitu, Saxoniam bello contrivit sibique tributarios fecit.
Anno 737. nunciatum est invicto Karolo principi, quod saeva gens Sarracenorum, obtenta Septimania
et Gothia, in partes iam Provinciae irruissent, castrumque munitissimum Avinionem per fraudem
quorumdam Provincialium comitatum illum obtinuissent. Quapropter exercitum congregans, illuc iter
dirigebat.
Praemissisque quibusdam exercitus sui principibus, qui castrum obsiderent, ipse prosecutus est,
praedictamque urbem obsidione circumdat. |
