| Quotation |
Siquidem mox ad suae dignitatis augmentum fratribus germanis, Heinrico scilicet atque Brunoni,
debitae munificentiae impendens affectum, ob robur regni atque firmamentum sibique indeficiens
tutamentum alterum Baioariae ducatus, alterum sanctae Coloniae sublimat honore archiepiscopatus,
quatenus, dextera sinistraque armatus aequaliter, omnem hostilem impetum audacter exciperet,
reprimeret viriliter, vinceret regaliter.
Interim effera gens Ungariorum, ferinis excita furiis, omnem invadit provinciam Noricorum, agros
villasque depopulando, miseros cives imparatos et passim palantes necando, mulieres et parvulos
tragica caede lacerando; quos cerneres non tam hostiliter saevire quam feraliter insanire.
Iam Alemanniam occupant, civitatem Augustam obsidione circumdant, eam acriter impugnant. |
