| Quotation |
Si enim bos fortis aratrum linguae in terra cordis audientium non traxisset, tanta fidelium seges
minime surrexisset.
Sed quoniam in bonis quae agitis scio quod et aliis congaudetis, uestrae uobis gratiae uicem reddo et
non dissimilia nuntio, quia, dum gens anglorum in mundi angulo posita in cultu lignorum ac
lapidum perfida nuncusque remaneret, ex uestrae mihi orationis adiutorio placuit ut ad eam
monasterii mei monachum in praedicatione transmittere deo auctore debuissem.
Qui data a me licentia a germaniarum episcopis episcopus factus cum eorum quoque solaciis ad
praedictam gentem in finem mundi perductus est, et iam nunc de eius salute et opere ad nos scripta
peruenerunt, quia tantis miraculis uel ipse uel hi qui cum eo transmissi sunt in gente eadem
coruscant, ut apostolorum uirtutes in signis quae exhibent imitari uideantur. |
