| Quotation |
Gregorius augustino episcopo anglorum gloria in excelsis deo et in terra pax hominibus bonae
uoluntatis, quia granum frumenti mortuum est cadens in terra, ne solum regnaret in caelo, cuius
morte uiuimus, cuius infirmitate roboramur, cuius passione a passione eripimur, cuius amore in
brittannia fratres quaerimus, quos ignoramus, cuius munere, quos nescientes quaerebamus,
inuenimus.
Quis autem narrare sufficiat, quanta hic laetitia in omnium corde fidelium fuerit exorta, quod gens
anglorum operante omnipotentis dei gratia et tua fraternitate laborante expulsis errorum tenebris
sanctae fidei luce perfusa est, quod mente integerrima iam calcat idola, quibus prius uesano timore
subiacebat, quod omnipotenti deo puro corde substernitur, quod a praui operis lapsibus sanctae
praedicationis regulis ligatur, quod praeceptis diuinis animo subiacet et intellectu subleuatur, quod
usque ad terram se in oratione humiliat, ne mente iaceat in terra.
|
