| Quotation |
In nomine Domini Dei et Salvatoris nostri Iesu Christi. Hludowicus, divina ordinante providentia
imperator augustus, omnibus fidelibus sanctae Dei ecclesiae ac nostris, praesentibus scilicet et futuris,
partibus Aquitaniae, Septimaniae, Provinciae et Hispaniae consistentibus.
Sicut nullius vestrum notitiam effugisse putamus, qualiter aliqui homines propter iniquam
oppressionem et crudelissimum iugum, quod eorum cervicibus inimicissima Christianitati gens
Sarracenorum imposuit, relictis propriis habitationibus et facultatibus quae ad eos hereditario iure
pertinebant de partibus Hispaniae ad nos confugerunt, et in Septimania atque in ea portione
Hispaniae quae a nostris marchionibus in solitudinem redacta fuit sese ad habitandum contulerunt, et
a Sarracenorum potestate se subtrahentes nostro dominio libera et prompta voluntate se subdiderunt,
ita ad omnium vestrum notitiam pervenire volumus, quod eosdem homines sub protectione et
defensione nostra receptos in libertate conservare decrevimus.
1. Eo videlicet modo, ut sicut caeteri liberi homines cum comite suo in exercitum pergant, et in marcha
nostra iuxta rationabilem eiusdem comitis ordinationem atque admonitionem explorationes et
excubias, quod usitato vocabulo wactas dicunt, facere non negligant, et missis nostris aut filii nostri
quos pro rerum opportunitate illas in partes miserimus aut legatis qui de partibus Hispaniae ad nos
transmissi fuerint paratas faciant et ad subvectionem eorum veredos donent. |
