| Quotation |
Bellica sed subito virtus bene condita iura
Mutavit, sacrae fidei spargendo nefandi
Dogmatis errorem, populum laesitque fidelem.
Perfida nam Saracenorum gens indomitorum
Urbis Marte petit duros huiusce colonos,
Eripuit regni sortem sibi vi quoque clari
Extinxitque bonum regem baptismate lotum,
Qui pridem merito gessit regalia sceptra
Et cives iustis domuit quot tempora frenis.
Hostili ferro certe quo iam superato
Ac reliquo victo tanta de caede popello,
Ductor barbaricae gentis, structor quoque pugnae,
Vir sat perversus, vita rituque profanus,
Vindicat imperii sortem sibi denique tanti,
Collocat et socios populato rure nefandos,
Implens maerentem non paucis hostibus urbem,
Polluit et veterem purae fidei genetricem
Barbarico ritu, quod nam miserabile dictu,
Paganos iustis intermiscendo colonis,
Quo sibi suaderent patrios dissolvere mores
Deque profanato secum sordere sacello. |
