| Quotation |
Non multo post interiecto tempore Hugo abba in locum Ruotberti substitutus est, vir strenuus, humilis, iustus, pacificus et omni morum honestate fundatus; siquidem Odo et Ruotbertus, filii
Ruotberti, adhuc parvuli erant, quando pater extinctus est, et idcirco non est illis ducatus commissus. Per idem tempus gens Sarracenorum in Benevento ex Africa veniens universam pene regionem illam invaserunt, caedibus, rapinis ac incendiis omnia depopulantes. Contra quos Ludowicus imperator exercitum contrahit, et veritus, ne forte adversus innumerabilem
hostium multitudinem vires regni non sufficerent, ad Lotharium fratrem in Gallias legatos mittit,
omnino exposcens, ut ad prefatae nequissimae gentis vires extenuandas audaciamque refrenandam sibi cum Dei auxilio, virtute quoque Francorum, opitularetur. |
