| Quotation |
Omnium videlicet sancte dei ecclesie fidelium nostrorumque tam presentium quam et futurorum cognoscat industria, quia, cum gratia auxiliante divina regnum Italicum obtinuimus primum deoque
duce Papiam venimus civitatem, adiit serenitatem nostram quidam monachus nomine Celsus
prepositus monasterii, quod Casa aurea vocatur et quod beatissime memorie antecessor ac consobrinus noster Ludouuicus imperator augustus a fundamentis in honore sancte et individue trinitatis construxit, afferens quoddam preceptum, in quo continebatur, qualiter prefatus imperator
pro amore ipsius sancte et individue trinitatis nec non et pro remedio animae sue omnes res suas, quas iusto ac legali tenore adquisivit tam infra urbem Romam quam extra ipsam Romuleam urbem, per totam scilicet Campaniam et etiam per omnem Romaniam nec non et ambos Spolitanos ducatus seu et
per totam Tusciam ad prenominatum monasterium contulit, ea videlicet ratione ut liceat fratribus ibidem regulariter viventibus easdem res tam interius quam exterius perpetualiter sine aliqua inquietudine possidere, et si abbas eiusdem monasterii obisset, ex propria congregatione abbatem sibi eligere licentiam haberent, et ut id monasterium perpetuis temporibus sub immunitate ac tuitione imperiali persisteret. |
