| Quotation |
Qui usque hodie tristitiam maeroremque uitam conferentem aeternam Ecclesiae generat, ut praedictum est, in eis qui post innumeras congeries criminum in sinu Ecclesiae congregantur.
Cibum uero spiritalem et potum, propter quod botrus est, praedictum in se credentibus cotidie ministrat: his dumtaxat qui congregantur ad eum in uineis Engaddi, ubi est "fons haedi"; hoc est: ubi multarum gentium nationes, quae uineae intelleguntur, agnito creatore, constructis conuenticulis credentium in Christo, habent in medio sui "fontem haedi", quod est sacrosancti baptismatis fons, ubi
haedi descendunt, qui erant deputandi a sinistris ante tribunal iudicis, aeterno igni tradendi, et
ascendunt agni immaculati, qui ad dexteram iudicis congregentur, aeterno regno donandi. Nam certum est unum esse fontem baptismatis in toto mundo, ubi Trinitatis coaeternae inuocato
nomine tincti sanctificantur, ut ex haedis agni efficiantur. |
