| Quotation |
Benedixerunt christo et ecclesiae conuersi ad fidem sacerdotes iudaeorum de quibus scriptum est: multa etiam turba sacerdotum oboediebat fidei.
Benedicendam in christo ecclesiam uerbique semine multiplicandam per gentium nationes plerisque
suis in typis sacerdotium uetus significat et quasi tropice christo loquitur, reddat tibi deus pater
credentes ex gentibus, ipsi enim sunt semen cui benedixit dominus, pro foenore quod commodasti
domino, id est pro illo singulariter sancto homine quem de uirgine assumptum unam tecum christi
personam idem filii dei nomen habere uoluisti.
Nam si non foenus domino sanctum praecessisset, nemo semen de femina sterili putaret esse
sperandum, hoc est si non homo per deum glorificatus ad dexteram patris sederet, nequaquam misera
gentilitas et praeuaricationis suae conscia ad multiplicationem seminis abrahae potuisset pertingere. |
