| Quotation |
Haud enim miseros fruendae luci, sed ferendo seruauere despectui; et ideo ait, factus est israhel in
nationibus quasi uas immundum, quod interpretes alii matulam transtulerunt.
Numquam, inquit, honesto israhel delegatus officio est, ut, post libertatis et dominationis insignia,
saltem inter seruos liberaliter censeretur, sed quasi uas ad naturae requisita compositum, ita
contumeliarum sordibus implebatur; et bene commemoratu nationum condicionem cumulauit
iniuriae dicendo, factus est israhel in nationibus quasi uas immundum, ac si diceret: heu, heu! quam flebilis fuit et quam magna conuersio, ut ille populus, qui solus magisterio sacrae legis inter munda
didicerat immundaque discernere, qui ideo segregatus a cunctis gentibus agitauerat, ne eum contagio ulla pollueret, nunc earum quoque iudicio gentium comprobatur immundus, quae, a primis uitae
annis usque ad postrema uiuendi, squalore flagitiorum omnium sorduerunt. |
