| Quotation |
Itaque temporibus gloriosi et orthodoxi Hludowici imperatoris Grecia, quae se matrem verborum et
genitricem philosophorum et omnium liberalium artium fautricem appellari contendit, de his superstitionibus superfluis, quae et nunc, Romanam ecclesiam, immo et omnem gentem Latina lingua utentem consulere temptavit, satisque mirandum in tam vilissimis quaestionibus
occupatam, longevo ventilatis aevo et perspicue ad liquidum dilucidatis, quae totius peritiae ac
facundiae se fore gloriatur auctricem, ut pelagus dialecticae subtilitatis expostulat, putans se posse veraciter distinguere vera a falsis. Ergo, ut intonat apostolus usque ad tertium caelum raptus, si "Iudaei signa petunt, et Greci sapientiam quaerunt", haeret sagacitas de puro fonte potantium, cur ita hebitudo sensus despicabilia sciscitando summa tenere conantes ignominiose obtenebrat, quos culmen magni intellectus, ut illi falso opinantur, in gremio amplitudinis suae velut coruscans amplectitur et fovet. Nempe cum populi Orientalium, quasi sub scabello Domini specialiter subsidentes, cum
Occidentalibus in fidei documentis disceptare videntur, quasi sol pulcherrimus mane in Oriente
positus, in occiduos suae lucis radios vesperi transmutat in tenebras. |
