| Quotation |
Quantum ad litteram exercitus Dei intelleguntur Romani, qui populo iudaicae gentis
deleto praeuaricatricem quoque ciuitatem flammis tradiderunt.
Qui non idcirco Dei exercitus appellantur quod in cultu christianae religionis adhuc tunc temporis fuissent fundati, sed quia uoluntati Dei in exterminio iudaicae gentis paruerint.
Omnis enim qui uoluntati Dei obtemperat, exercitus et seruus illius appellatur, unde et regem
Nabucodonosor dominus columbam et seruum uocat, quia in deiectione ipsius populi praecepto illius oboediuit; neque enim Nabucodonosor aut populus romanus aduersus Hierusalem dimicaturi processissent, nisi nutu Dei ad hoc excitati fuissent. |
