| Quotation |
Defunctoque Gunduico, filii ipsius Gundobadus et Godigiselus, regno suscepto, Galliarum populos terrasque inter se diviserunt, ita ut Gundobadus duas portiones suis dicionibus vindicaret, tertia Godigiselus esset contentus. (...) In ipsis temporibus Sicambrorum gens ilico convalescens, multasque regiones, postpositis omnibus, dapibus contemptis et artioribus rebus dorsis inpositis, pene omnibus gentibus finitimis, duodecim regibus cum populis, sibi subiugatis, prostratis atque depopulatis, convalescenti manu suis subdiderunt dicionibus. Quas regiones sibi subiugatas, Galliarum fines invadendas audacter expetierunt. Quorum adiunctus Godigiselus, frater Gundobadi, preliandi cum Germanorum solatio contra Gundobadum arma arripuit. Quo fugato, regnum Galliarum paucis diebus sibi subiugasse visus est. |
