| Quotation |
Leo iam dicto non diu supervixit; ille Alexander dum funus germani vidisset, in magna superbia est
elevatus, et non tantum coram hominibus etiam contra Dominum conabatur se iactitaret.
Nam septuaginta statuae, quae Romani in Capitolio consecrarunt in honorem omnium gentium, quae
scripta nomina pectore gentium, cuius ymaginem tenebant, gestabant, et tintinnabulum
uniuscuiusque statuae erat, et sacerdotes die ac nocte semper vicibus vigilantes eas custodiebant, quae
gens in rebellionem consurgere conabatur contra Romanum imperium, statua illius gentis
commovebatur, et tintinnabulum in collo illius resonabat; ita scriptum nomen continuo sacerdotes
principibus deportarent, et ipsi absque mora exercitum ad reprimendam eandem gentem dirigerent.
Set dum fuissent praedictae statuae aereae Constantinopolim deportatae, ille iam fatus imperator
Alexander huiusmodi verba depromsit: Illo denique tempore Romanorum imperatores erant gloriosi,
quando istae statuae venerabantur. Unde statim sericis vestibus venire iussit et singulas circumdedit. |
