| Quotation |
Qui denuo non ratione, non aliqua inductus vel iusta vel probabili causa sed solo superbiae spiritu
elatus contra pietatem, iusticiam, fidem et facta nobis sacramenta fidelitatis non solum honorem, sed
et vitam nostram impugnare conatus est, adeo ut reconciliatos nobis Saxones et Turingos,
quoscumque potuit, adversus nos concitaret et erecto vexillo Saxogiam et Turingiam nobis, quam
obtinere iuraverat, prohiberet.
Ob eius modi culpam illius comprovinciales tam Saxones quam Turingi cum caeteris principibus
nostris coram nobis ex iure gentium inde sententiam proferentes ipsum sicut manifestum hostem
regni et imperii Romani persequendum censuerunt, predia vero eius et, quae a nobis habuerat,
beneficia imperiali nostrae ditioni ac potestati adiudicaverunt.
Ex eisdem beneficiis beato Martino ad aecclesiam Traiectensem tum pro remedio animae nostrae, tum
ob fidele servicium dilecti nostri Covnradi eiusdem sedis episcopi quendam comitatum Fresiae
nomine Ostrogowe et Westrogowe cum omni iure et utilitate, quam Eggebertus in hoc comitatu
habuit, in proprium tradidimus. |
