| Quotation |
Cuius animam, ut sanctus Gregorius in dialogo scribit, solitarius quidam vir magnae virtutis apud
Lipparam insulam vidit inter Iohannem papam et Simmachum patricium discinctum et discalciatum
deduci et in ollam Vulcani demergi.
Ante tamen, cum adhuc valeret, sed iam senior, convocans Gothos et gentis suae primates,
Athalaricum, Amalsuindae filium vix decem annorum, regem constituit, exhortans suos, ut regem
colerent, senatum populumque Romanum amarent, principem Orientis placatum semper et
propicium habere curarent.
Quo defuncto, Gothi, ut precepit Theodericus, Athalaricum cum matre sua preficiunt regno, hoc quod
preceptum erat custodientes, quam diu Athalaricus et mater eius vivebant, qui pene per octo annos
regnabant. |
