| Quotation |
Quidni? Te quippe multis iam in tristicia sedentis, domine gentium, ploratibus a patre spirituum
tandem et vix impetratum caput, non immerito quodque catholicum et orthodoxum eiusdem
aecclesiae membrum quocumque prevalet favore prosequitur, tibi Romanus a pulvere iam
expergiscens orbis a mari usque ad mare, immo totus a solis ortu usque ad occasum mundus,
inenarrabili tripudio congratulatur.
In te suscitatum David germen iustum universa sanum sapientia corda speculantur; sed precipue Deo
servientium personae undique prorumpentes e latibulis, lumen te sibimet in tenebris exortum, divina
quedam de te presagia conferentes, tempus iam venisse miserendi sui testantur, de tua indole quid
iustum audire vel sanctum, sanctae quevis animae sui erga Christum regem servitii fructum esse
confidenter arbitrantur. |
