| Quotation |
Rex Heinricus Mogontiae natalem Domini celebrans, prescriptum Ruotpertum in gratiam recepit.
Eo tempore orta simultate inter Colomannum regem Pannoniae germanumque eius vocabulo Almum,
eo quod uterque sibi potius regiam competere dignitatem iure gentis illius contenderet, spoliatus tam
rebus quam ducatu, quo inter Ungros clarus et ut decuit fratrem regis a rege secundus claruit, Almus
regem Heinricum adiit, et in auribus totius senatus haut secus quam ille quondam [Hiemsalis
germanus] Atherbal miserias suas deplorans, Romani imperii magnificentiam in compassionem et
defensionem sui flectere curavit.
His querelis motus rex Heinricus, insuper etiam quod idem Colomannus fines regni nostri, scilicet in
locis maritimis, invaserit, Ungariam exercitu petit; sed preparatis multiformiter adversariis,
maximeque per obstructa fluminis undique vada, post morosam et cassam obsidionem castri Bresburg
pene inacte redit. |
