| Quotation |
Vnde spes est in Domino ut uociferantibus tubis sacerdotalibus in proximo corruat et Iherico, et
regnum proprio sanguine adquisitum optineat triumphator Iesus et in pace possideat quod sui iuris
est sponsus et custos ecclesiae Christus.
Cum enim Romanus pontifex per patientiam Teutonicum tyrannum diutius expectasset ut uel sic
prouocaretur ad poenitentiam, et scismaticus, abutens patientia eius, peccata peccatis adderet iugiter
ut error in amentiam uerteretur, uicarius Petri, a Domino constitutus super gentes et regna, Italos et
omnes, qui ei ex causa imperii et regni religione iurisiurandi tenebantur astricti, a fidelitate eius
absoluit, et Italiam fere totam a facie furentis et praesentis tanta felicitate et celeritate excussit ut in ea
nichil habere uideatur nisi tortores, quos euitat interdum, et angustiarum, quas euitare non potest,
iuge supplicium.
Abstulit ei etiam regiam dignitatem ipsumque anathemate condempnauit, et inhibuit auctoritate Dei
ne uires ullas amodo in bellicis congressionibus habeat, aut de Christiano aliquo uictoriam
consequatur aut alicubi quiete et pace gaudeat, donec fructus poenitentiae condignos operetur; in quo
secutus est exemplum Gregorii septimi, decessoris sui, qui nostra aetate Henricum imperatorem
ecclesiae priuilegia conuellentem deponens in concilio Romano simili sententia condempnauit. |
