| Quotation |
Irradiatus quoque vir beatissimus Remigius, ut exterius, veteris exemplo legislatoris, vultus
illustratione, ita multoque magis interius divini fulgoris illuminatione, spiritu prophetico, que ipsis vel
eorum forent eventura prosapie, traditur predixisse: quomodo videlicet eorum posteritas regnum
nobiliter esset propagatura, ecclesiam quoque Christi sublimatura Romanaque dignitate vel regno
potitura et victorias contra impetus aliarum gentium perceptura, si non a bono degenerantes salutis
viam forte relinquerent et, quibus deus offenditur, scelera consectati pestiferorum viciorum laqueos
incurrerent, quibus regna subverti atque de gente solent in gentem transferri.
A domo denique regis eundi ad baptisterium via preparatur, vela cortineque appenduntur, hinc inde
platee sternuntur, ecclesia componitur, baptisterium balsamo ceterisque odoramentis aspergitur
tantamque dominus populo gratiam subministrabat, ut odoribus se paradisi refoveri gauderet. |
