| Quotation |
Ego Ludwicus imperator augustus statuo et concedo per hoc pactum confirmationis nostre tibi, beato
Petro principi apostolorum, et per te vicario Pascali summo pontifici et successoribus eius in
perpetuum, sicut a predecessoribus vestris usque nunc in potestate vestra et dicione tenuistis et
disposuistis civitatem Romanam cum ducatu suo et suburbanis atque viculis omnibus et territoriis
eius montanis atque maritimis litoribus et portubus seu cunctis civitatibus, castellis, oppidis ac villis in Tuscie partibus.
Idem: Quando divina vocatione huius sacratissime sedis pontifex de hoc mundo migraverit, nullus ex
regno nostro aut Francorum aut Langobardus aut de qualibet gente homo sub nostra potestate
constitutus licentiam habeat contra Romanos aut publice aut privatim veniendi vel electionem
faciendi, nullusque in civitatibus aut territoriis ad ecclesie beati Petri apostoli potestatem pertinentibus
aliquid malum propetrea facere presumat, sed liceat Romanis cum omni veneratione et sine qualibet
perturbatione honorificam suo pontifici exhibere sepulturam et et eum quem divina inspiratione et
beati Petri intercessione omnes Romani uno consilio atque concordia sine aliqua promissione ad
pontificatus ordinem elegerint sine qualibet ambiguitate et contradictione more canonico consecrare et
dum consecratus fuerit, legati ad nos vel ad successores nostros reges Francorum dirigantur, qui inter
nos et illum amiciciam et caritatem ac pacem socient.
Ex his, inquiunt Romani, augustorum concessionibus claret pietas ipsorum et obedientia in Dei
legibus, siquidem concessione sibi contra ecclesiasticas regulas a Romanis pontificibus facta non
solum abuti, sed nec uti voluerunt; quin potius privilegiis iniquis renuntiantes pontificales electiones
canonice libertati restituerunt. |
