| Quotation |
Gregorius episcopus servus servorum Dei omnibus episcopis et viris nobilibus cunctisque tam
maioribus quam minoribus in insula Corsica consistentibus salutem et apostolicam benedictionem.
Scitis, fratres et karissimi in Christo filii, non solum vobis, sed multis gentibus manifestum esse
insulam, quam inhabitatis, nulli mortalium nullique potestati nisi sanctae Romanae ecclesiae ex debito
vel iuris proprietate pertinere et quod illi, qui eam hactenus violenter nichil servitii nichil fidelitatis
nichil paenitus subiectionis aut oboedientiae beato Petro exhibentes tenuerunt, semetipsos crimine
sacrilegii et animarum suarum gravi periculo obligaverunt.
Cognoscentes autem per quosdam fideles nostros et vestros amicos vos ad honorem et iustitiam
apostolici principatus, sicut oportere cognoscitis, velle reverti et diu subtractam ab invasoribus
iustitiam beato Petro vestris temporibus vestrisque studiis rediberi, valde gavisi sumus scientes
vobis hoc non solum ad presentem sed etiam ad futuram provenire utilitatem et gloriam. |
