| Quotation |
Hic est rex Ludovicus, cuius pater Lodovicus usquequaque dilatavit regnum suum et coniunxit ei in
matrimonium filiam Guilelmi ducis Aquitanorum et comitis Pictavorum, propter quam acquisivit
omnem Aquitaniam, Guasconiam, Bascloniam et Navarriam usque ad montes Pirreneos et usque ad
Crucem Karoli.
Hic est rex Ludovicus, qui quinto decimo anno regni sui, presidente in Romana cathedra Eugenio,
cum magno exercitu vexillo vivificae crucis insignito Iherosolimam perrexit gentem inimicam fidei
debellaturus, sed incognito dei iudicio maxima suorum parte amissa absque triumpho rediit pravoque usus consilio uxorem suam cum prenominata terra, quae regnum aliquando per se extiterat,
dimisit et postmodum coniunctus est filiae imperatoris Hispanorum, qua defuncta tercio nupsit
sororem comitis Henrici, de qua primum suscepit filium nomine Philippum anno regni sui XXXmo
IIIo, a Galliis redeunte Alexandro papa. |
