| Quotation |
Nec quis quotus sit imperatorum attenditur, sed quomodo omnium domuerit tirannidem aut
represserit clementia Dei, qui pro decreto iustitiae, quando uult, flagellum inducit in delinquentium
penam et, quando uult, quos fecit penitentes admittit ad ueniam.
Decreueram hic subsistere et ad alias a Romanis transire historias; sed quia in cathalogum
imperatorum ille, a quo genti meae nomen est, Seuerus occurrit, qui aduersus Christi nomen
tyrannidem grauem exercuit, illum adhuc solum adiciam, ne Seueriae uel Seresberiae nostrae parcere
uidear.
Sed profecto hanc prophanam in Christianos et Ecclesiam persecutionem celestis ultio e uestigio
prosequuta est. |
