| Quotation |
Qui beate vite et christiane militie tyrocinio prudens in carne ambulavit, sed non secundum carnem
militavit; pro iustitia et fide fausto triumphans martyrio vitam finivit temporalem, mox pro eo feliciter
adeptus ineffabilem vite perennis immortalitatem et semper virentis paradysi desiderandam pre
omnibus amenitatem.
Hic quidem a civibus Romanis, sed precipue ab urbis optimatibus, magno planctu et eiulatu, ut
oportuit, lamentatus, post magnificas exequiales agendas officiose satis et honeste iuxta ritum
Romanum apud sanctum Petrum celebratas, in medio ipsius paradysi debita laudum et ymnorum
impensione gratiosa, devotissime est tumbe marmoree impositus, et ita decentissima sibi tumulatione
Deo et sancto Petro est ab omnibus intentissime commendatus.
Tandem vero, cuius in vita sua tyro municipatui impensius militaverit, et quod mundo revera usus sit
tamquam non uteretur, palam omnibus apparuit, cum tot miraculis et virtutibus non modo Romanis,
verum quoque omnibus illuc undique concurrentibus iam iamque evidentissime exclaruit, quam
magnus sit apud Deum. |
