| Quotation |
Quocirca omnium sanctae dei aecclesiae nostrorumque fidelium presentium videlicet ac futurorum
comperiat sollertia, qualiter Gvido venerabilis abbas monasterii sanctae dei genitricis semperque
virginis Mariae in comitatu Sabinensi constructi in loco qui dicitur Acutianus nostram adiens
presentiam ostendit nobis nostrorum antecessorum regum vel imperatorum precepta eidem
monasterio facta atque suppliciter postulans, quatinus pro dei amore sanctaeque genitricis dei Mariae
eadem precepta nostra imperiali ac preceptali auctoritate confirmaremus.
Nos vero eius iustis postulationibus assentientes confirmamus iam dicto monasterio, quicquid in
superioribus continetur preceptis, prout iuste et legaliter possumus, videlicet quicquid habere videtur
in eodem territorio Sabinensi, [...] omniaque in integrum, quae ad predictum monasterium pertinere videntur iuste et
legaliter aut ab aliis hominibus deum timentibus acquisierit aut ab his, qui modo de rebus aecclesiae
iniuste tenent, et quae in civitate Romana aut in aliqua parte nostri regni Hitalici habere videtur aut
acquisierit, per hoc nostrum preceptum eidem sancto loco confirmamus, una cum terris vineis
monasteriis ei subiectis aecclesiis castellis curtibus domibus villis capellis aquis aquarumque
decursibus piscationibus molendinis mercatis cultis et incultis colonis aldiis aldiabus manentibus
omnibusque residentibus super terram ipsius monasterii servis ancillis omnique familia utriusque
sexus cunctisque animalibus.
Atque pro dei amore nostraeque animae salute eidem monasterio ministrantibus per hoc nostrum
preceptum perdonamus, ut nullus eorum aut suorum hominum deinceps freda aut tributum donet vel mansiones faciat invite aut fideiiussor sine suo velle existat aut in aliquo donet portinaticum aut
ripaticum vel herbaticum aut glandaticum vel pontonaticum, tam de monachis quam de claericis
quamque de hominibus super terras eorum residentibus tam ingenuis quam libellariis quam et servis,
ac eos sub nostra tuitione recepimus. |
