| Quotation |
In nomine domini et salvatoris nostri Iesu Christi. Anno incarnationis eius millesimo centesimo tricesimo octavo, indictione prima, VII. idus iulii, anno autem imperii domini Lotharii invictissimi imperatoris caesaris augusti sexto, residente eodem invictissimo imperatore ad aquas Pensiles, consedente etiam Peregrino patriarcha Aquilegiensi cum archiepiscopis et episcopis abbatibusque quampluribus causidicus pro Romana ecclesia Girardus cardinalis tituli sanctae Crucis directus est nec non et Guido cardinalis, <qui ambo postea Romanam rexerunt ecclesiam>, Aimericus cancellarius et diaconus cardinalis, Baldovinus presbiter cardinalis
<qui post Pisanorum archiepiscopus factus est> et Norbertus Clarevallensis abbas ac alii quamplures
civitatis Romanae nobiles.
Ex parte Casinensis ecclesiae auditores extiterunt Richiza <clementissima> imperatrix, Henricus dux
Baioariae, gener imperatoris, Conradus dux Sueviae <qui postea Romani imperii sceptra suscepit>,
Otto de Burchisino, consobrinus imperatoris, Fridericus marchio Anchonitanus, Malaspina marchio
Liguriae, Henricus episcopus Ratisponensis, Anno episcopus Basiliensis, Anno abbas Luneburgensis,
Gualfridus palatinus iudex Romani imperii. |
