Quotation |
Auctoritas ecclesiastica patenter admonet, insuper et regia [maiesta]s canonicae religioni assensum
praebet, ut, quemcumque ex familia propria vel ecclesiastica ad sacros ordines [promovere] voluerit,
in praesentia sacerdotum ac mona[chorum], canonicorum nobiliumque virorum civem Romanum [sub testa]mento libertatis manus missione firmiter roboretur. Ideoque ego in Dei nomine ill. gratia Dei abbas ex monasterio eximii praesulis illius quendam vernaculum nomine ill. de ipsa sancti ill. familia exortum, ut credimus, sacris ordinibus dignum, ad cornu sacri altaris promovere volumus, atque ob hoc e vinculo totius noxiae servitutis ad praesens
absolvimus et pleniter ingenuum esse censemus, ita ut ab hodierno die ingenuus sit et ingenuus
permaneat, tamquam si de parentibus bene nobilibus fuisset procreatus vel natus. Peculiare quidem suum sive collaboratum cum omnibus facultatibus suis absque ullius senioris
retractatione sibi habeat concessum atque indultum; civis Romanus, habens portas apertas, eam
denique pergat partem, quamcumque delegerit, ubi Christo domino canonice religione perpetua
servire possit.
Et ut haec auctoritas omni tempore firma et stabilis atque inconvulsa permaneat, manu propria eam
subter firmavimus, atque fideles nostros, sacerdotes videlicet ac monachos pariterque canonicos, seu
nobiles viros similiter firmare decrevimus. |