| Quotation |
Auctoritas ecclesiastica patenter admonet, insuper et maiestas canonicae religioni assensum praebet,
ut, quemcumque ad sacros ordines ex familia propria promovere ecclesia quaeque delegerit, in
praesentia sacerdotum, canonicorum simul et nobilium laicorum, et cui subiectus est, manumissione
sub libertatis testamento solemniter roboretur.
Idcirco, in Dei nomine, quemdam ecclesiae nostrae famulum, nomine talem, sacris dignum ordinibus,
ecclesiasticis eruditum disciplinis, ad altaris cornu, palam insignibus viris, civem Romanum statuo
per hoc sacrae auctoritatis testamentum; ita ut ab hodierno die et tempore bene et inconvulse
ingenuus atque ab oni prorsus vinculo permaneat securus, tamquam si ab ingenuis procreatus fuisset
parentibus vel natus.
Idemque pergat, quamcumque volens elegerit canonice partem, portas habens apertas, intrandi,
exeundi, iuxta regulam obnoxe roboratam, ita ut deinceps nec nobis ullum nec successoribus nostris
noxialis debeat conditionis servitium, neque aliquid libertinitatis obsequium cuiquam impendat, sed
ob amorem honoremque domini nostri Iesu Christi, ad cuius militiam electus est, absolutus atque
velut civis Romanus a cunctae catena servitutis ereptus, sub integra plenaque ingenuitate consistens,
securus cunctis diebus vitae suae permaneat, quatenus per hanc absolutionem securius liberiusque
atque honestius divinae potentiae, cui mancipatur, Domino adiuvante, famulari valeat, et per hunc
manumissionis atque ingenuitatis titulum bene semper ingenuus atque inconvulse securus ab omni
servitutis occasione noxialis existat. |
