| Quotation |
Unde sanctitatem vestram pio fraternae dilectionis affectu coniunctam hortamur, ut pro tantis
afflictionibus et miseriis capiti nostro illatis ex totis precordiis vestris nobiscum pariter condoleatis et contra evidentissimum et immanem inimicum nostrum consurgere toto annisu studeatis. Nos namque illius non valentes sustinere tantas insidias, quia per terram ire nequimus, per marinum
iter Deo propitio Franciam proficisci debemus, gloriosos scilicet reges deprecaturi, ut ecclesiam sancti
Petri et civitatem Romanam, totius mundi caput et dominam, a tantis oppressionibus et calamitatibus
liberent, salvam et quietam sinant manere potentique manu ab hostium, quas patimur, insidiis
tueantur; nec nos ob aliud illuc ituros, nisi pro communi salute, procul dubio credite.
Sed sicut veridico multorum relatu didicimus, cum nos de urbe Roma fuerimus egressi caeptumque
iter egerimus, audimus eundem Lambertum satellites suos velle colligere Romamque rursus
expugnaturus adire. |
