| Quotation |
In quo etiam facto praefigurabatur quod paucitas Iudaeorum esset in dominum creditura, et
multitudo gentium ad fidem uentura; Iudaei nempe ipsum filium Dei signa facientem uiderunt,
apostolos illius praedicatores et magistros habuerunt, et tamen pauci ex eis fidei iugo colla
submiserunt caeteris in infidelitate persistentibus.
Porro gentium populus, etsi Christum in carnis infirmitate positum miracula operantem uidere non
potuit, sola tamen praedicatione apostolorum contentus paene totus sacrae fidei acquieuit.
Proinde illis tormentis perpetuis ob infidelitatem condemnatis nobis (si quod fide credimus operibus
exornemus) aeterna beatitudo repromittitur, dicente nobis saluatore: Beati qui non uiderunt et
crediderunt. |
