| Quotation |
Quorum regiones cum earum rerum, quae ad alimentum pertinent, opulentissimas idem vulgus
indocile repperisset, ceperunt luxuriis enormibus contra indigenarum mansuetudinem debachari.
Cum enim plurimorum annorum segetes triticeas, ut in ea terra moris est, in modum turrium per
agros stabilitas cernerent, quas nos 'metas' vulgariter vocare solemus, cum carnium diversarum
aliorumque victualium, quorum illa feracissima tellus est, copiae suppeterent, non contenti
humanitate eorum mira dementia, ipsi alienigenae, ceperunt turpiter conculcare gentiles, et cum
idem, utpote Christiani Christianis, venalia cuncta gratanter ingererent, illi, libidinis impatientes, piae
hospitalitatis ac beneficientiae immemores bello gratis eos aggrediuntur, dum illos opinantur nichil
ausuros contra ac penitus futuros imbelles.
Rabie igitur execranda publicis quos diximus horreis per eos ingerebatur incendium, puellis
eripiebatur violentia illata virginium, dehonestabantur coniugia crebris raptibus feminarum, vellebant
sive ustulabant suis barbas hospitibus, nec iam de emendis usui necessariis quippiam tractabatur, sed
quisque eorum prout poterat rapinis et cedibus nitebatur, sic se acturos mira lascivia contra Turcos
libere minabantur. |
