| Quotation |
Cumque ingentem Domino populum in Fresonis adquireret, multique ab eo spiritali doctrinae edocati ad agnitionem veritatis, inradiantibus verae lucis radiis, pervenerunt, tunc quippe, Domino patrocinante, alias Germaniae praedicandi causa partes adiit et supradictum locum, cui gemini praeerant germani, Dettic videlicet et Deorulf, Domino auxiliante, obtinuit, eosque a sacrilega idulorum censura, qua sub quodam christianitatis nomine male abusi sunt, evocavit ac plurimam populi turbam, rectae patefacta intellegentiae viae, errorum deposito horrore, a malivola gentilitatis superstitione retraxit et monasterii, collecta servorum Dei congregatione, cellam construxit. (...) Similiter et iuxta fines Saxonum Hessorum populum paganicis adhuc ritibus oberrantem a demoniorum euangelica praedicando mandata captivitate liberavit. (...) Cumque sanctus vir adlatas legisset litteras, carptim se invitatum ad Romam intellexit festinusque summum oboedientiae gradum implere temptavit, clientumque confestim stipatus caterva et fratrum circumseptus agmine, Franchorum ac Burgundionum Italiaeque, iam collibus Alpium transcensis, limitum fines militumque terminos transmigravit. (...) Et ad extremum, qualiter populi, per devia prius facinorum oberrantes, fidei documenta sua praedicatione perciperent, sciscitatus est. (...) Quique etiam, dum per longos viarum anfractus ingentium populorum adisset confinia, iam quidem ad praefatum Franchorum principem venit, et venerabiliter ab eo susceptus, litteras praedicti Romani pontificis sedisque apostolicae Carlo duce detulit, eiusque dominio ac patrocinio subiectus, ad obsessas ante ea Hessorum moetas cum consensu Carli ducis rediit. (...) Et seniores plebis populique principes affatus est eosque, relicta ignorantiae caecitate, ad acceptam dudum christianitatis relegionem iterando provocavit: quia, facessante suorum regum dominio, magna quidem eorum comitum multitudo sub Theotbaldi et Hedenes periculoso primatu, qui lugubre super eos tyrannici ducatus et infestum vastationis potius quam devotionis obtinebant imperium, vel corporali per eos praeventa morte vel hostili siquidem eductione captivata est in tantumque diversis constricta malis, ut cetera que manebat residua populi turba Saxonum se subiecerat principatu; (...) quoniam, cessante relegiosorum ducum dominatu, cessavit etiam in eis christianitatis et relegionis intentio, et falsi seducentes populum introducti sunt fratres, qui sub nomine relegionis maximam hereticae pravitatis introduxerunt sectam. (...) Cumque renovatus per populum fidei inluxisset candor, et plebs ab ingenti erroris ereptus est laqueo, iam expulsis profani hostis amicis et infestis populi supradictis seductoribus, messem quidem multam cum paucis admodum messoribus incoluit. (...) Et ex Brittaniae partibus servorum Dei plurima ad eum tam lectorum quam etiam scriptorum aliarumque artium eruditorum virorum congregationis convenerat multitudo. (...) Et alii quidem in provincia Hessorum, alii etiam in Thyringea dispersi late per populum, pagos ac vicos verbum Dei praedicabant. (...) Cumque ingens utriusque populi multitudo fidei sacramenta, multis milibus hominum baptizatis, perciperet, iam defuncto beatae memoriae Gregorio secundo sedis apostolicae papae et glorioso praefatae sedis Gregorio iuniore apostolici culminis cathedram praesidente, denuo Romam nuntii eius venerunt sanctumque sedis apostolicae pontificem adlocuti sunt eique prioris amicitiae foedera, quae misericorditer ab antecessore suo sancto Bonifatio eiusque familiae conlata sunt, manifestaverunt; (...) Hisque omnibus rite confectis, Baguariorum temporibus Hugoberti ducis adiit terras praedicationisque studium apud eos diligentissime exercuit et multas considerando circuit aecclaesias. (...) Tantoque divinae fortitudinis zelo armatus est, ut quendam quidem scismaticum heretica pravitate deceptum nomine Eremvulfum iuxta canonum decreta damnavit atque abiecit et populum a perversa sectae eius idolatria correxit. |
