| Quotation |
Nam dicebant eorum dominum ut heredem regni ita heredem fore patriciatus et beatum Nicolaum
decreto firmasse, ut nullus in pontificum numero deinceps haberetur, qui non ex consensu regis
eligeretur.
His et talibus machinationibus decepta imperatrix feminea licentia assensum dedit operi nefario,
quale non fuit a die, qua gentes esse ceperunt, ut, ubi nullus clericorum Romanorum vel laicorum
interfuit papae electioni, ibi pontifex eligeretur a consimilibus fornicatoribus et symoniacis, quive
accipiens per manus regis et reginae crucem et papalia insignia, ab aquilone veniret Romam, unde
secundum Ieremiam pandetur malum super universos habitatores terre; quid plura?
Eligunt sibi Parmensem Cadolum, virum divitiis locupletem, virtutibus egenum; qui stipatus multis
militibus intravit Longobardiam, habens secum in comitatu cervicosos episcopos Longobardiae,
nescientes suave iugum Domini ferre. |
